এআই জগতত চাঞ্চল্য! ক্লডৰ সহায়ত OpenAIৰ সুৰক্ষা ত্ৰুটি উন্মোচন ৩ ভাৰতীয় গৱেষকৰ

 

নতুন দিল্লী: কৃত্ৰিম বুদ্ধিমত্তাৰ জগতত সৃষ্টি হৈছে চাঞ্চল্য। প্ৰতিদ্বন্দ্বী কোম্পানী OpenAIৰ সুৰক্ষা ব্যৱস্থাৰ গুৰুত্বপূৰ্ণ দুৰ্বলতা চিনাক্ত কৰি চৰ্চালৈ আহিছে ভাৰতীয় মূলৰ তিনিজন চাইবাৰ সুৰক্ষা গৱেষক। বিশেষ কথাটো হ’ল, এই সুৰক্ষা পৰীক্ষণৰ সময়ত তেওঁলোকে Anthropicৰ AI মডেল ‘Claude’ৰ সহায় লৈছিল।

অৱশ্যে এয়া কোনো অনৈতিক চাইবাৰ আক্ৰমণ নাছিল। OpenAIৰ অনুমোদিত Bug Bounty Programmeৰ অধীনত সুৰক্ষা ত্ৰুটি বিচাৰি উলিওৱাৰ অংশ হিচাপেই এই পৰীক্ষা চলোৱা হৈছিল।

আমেৰিকাৰ সংবাদমাধ্যম The Wall Street Journal-ৰ প্ৰতিবেদন অনুসৰি, ভাৰতীয় চাইবাৰ ছিকিউৰিটি ষ্টাৰ্টআপ Hectron AIৰ গৱেষক হৰ্ষ জয়ছোৱাল, মোহন পেধাপতি আৰু ৰাহুল মাইনীয়ে এই সুৰক্ষা পৰীক্ষণ সম্পন্ন কৰে।

৭২ ঘণ্টাৰ ভিতৰতে আভ্যন্তৰীণ ব্যৱস্থালৈ প্ৰৱেশ

প্ৰতিবেদন অনুসৰি, সমগ্ৰ প্ৰক্ৰিয়াটো সম্পূৰ্ণ কৰিবলৈ গৱেষক দলটোৰ ৭২ ঘণ্টাতকৈও কম সময় লাগিছিল। প্ৰথমে OpenAIৰ এটা কমিউনিটি ফ’ৰামত থকা ইমেজ আপলোড ব্যৱস্থাৰ এক কাৰিকৰী দুৰ্বলতা তেওঁলোকে চিনাক্ত কৰে।

এই দুৰ্বলতাৰ জৰিয়তে চাৰ্ভাৰত ক্ষতিকাৰক ক’ড চলোৱাৰ সম্ভাৱনা আছিল। গৱেষকসকলে এই ত্ৰুটি বিশ্লেষণ কৰাৰ সময়ত Claudeৰ সহায় লয়। AI মডেলটোৱে ক’ড লিখা, সংশোধন আৰু বিভিন্ন পৰিস্থিতিৰ সৈতে খাপ খুৱাই পৰীক্ষা চলোৱাত সহায় কৰিছিল।

পৰৱৰ্তী পৰ্যায়ত গৱেষকসকলে OpenAIৰ কৰ্মচাৰীৰ একাউণ্টৰ সৈতে জড়িত আন এটা সুৰক্ষা দুৰ্বলতা চিনাক্ত কৰে। এই পথ ব্যৱহাৰ কৰি এজন কৰ্মচাৰীৰ Codex একাউণ্টৰ জৰিয়তে OpenAIৰ আভ্যন্তৰীণ GitHub পৰিৱেশত উপনীত হ’বলৈ সক্ষম হোৱা বুলি প্ৰতিবেদনত প্ৰকাশ পাইছে।

Claude আছিল সহায়ক, সিদ্ধান্ত গৱেষকৰ

গৱেষকসকলৰ মতে, এই অভিযানত Claudeএ মূলতঃ সহায়কৰ ভূমিকা পালন কৰিছিল। ক’ড লিখা আৰু পৰীক্ষণৰ গতি বৃদ্ধি কৰাত AIটোৱে সহায় কৰিছিল যদিও, কোনো ভুলৰ পিছত পৰৱৰ্তী পদক্ষেপ কি হ’ব বা কেনেধৰণৰ কৌশল গ্ৰহণ কৰিব—সেই চূড়ান্ত সিদ্ধান্ত গৱেষকসকলেই লৈছিল।

এই সুৰক্ষা পৰীক্ষণৰ সময়ত AI টোকেনৰ বাবে তেওঁলোকৰ মুঠ খৰচ ৩,০০০ ডলাৰতকৈ কম হোৱা বুলি জানিব পৰা গৈছে। ত্ৰুটিসমূহ অৱগত কৰাৰ পিছত OpenAIয়ে সেইবোৰ সমাধান কৰাৰ লগতে গৱেষক দলটোক প্ৰায় ৬,৫০০ ডলাৰৰ বাগ বাউন্টি প্ৰদান কৰে।

কোন এই তিনিজন চাইবাৰ সুৰক্ষা গৱেষক?

হৰ্ষ জয়ছোৱাল

হৰ্ষ জয়ছোৱাল Hectron AIৰ সহ-প্ৰতিষ্ঠাপক আৰু এই সুৰক্ষা গৱেষণাৰ নেতৃত্বত আছিল। তেওঁ দীৰ্ঘদিন ধৰি চফট্ৱেৰ দুৰ্বলতা চিনাক্তকৰণ আৰু Bug Bounty ক্ষেত্ৰত সক্ৰিয় হৈ আছে। ইয়াৰ পূৰ্বে Zomato আৰু Cure53ৰ সৈতে সুৰক্ষা অভিযন্তা হিচাপে কাম কৰাৰ অভিজ্ঞতা আছে তেওঁৰ। HackerOne প্লেটফৰ্মৰ জৰিয়তে Apple, PayPal আৰু GitHubৰ দৰে বৃহৎ প্ৰযুক্তি প্ৰতিষ্ঠানৰ সুৰক্ষা ত্ৰুটি চিনাক্ত কৰিও তেওঁ পৰিচিতি লাভ কৰিছে।

মোহন পেধাপতি

মোহন পেধাপতি Hectron AIৰ সহ-প্ৰতিষ্ঠাপক তথা Chief Technology Officer (CTO)। ৱেব ছিকিউৰিটি, Source Code Review আৰু Mobile Application Security তেওঁৰ বিশেষ দক্ষতাৰ ক্ষেত্ৰ। অন্ধ্ৰ প্ৰদেশৰ RGUKT Nuzvidৰ পৰা Computer Scienceত B.Tech সম্পূৰ্ণ কৰা মোহনে ইয়াৰ পূৰ্বে Cure53ত Security Consultant হিচাপে কাম কৰিছিল।

ৰাহুল মাইনী

ৰাহুল মাইনীও Hectron AIৰ এগৰাকী সুৰক্ষা গৱেষক আৰু আন্তঃৰাষ্ট্ৰীয় Bug Bounty ক্ষেত্ৰত পৰিচিত নাম। ইয়াৰ পূৰ্বে তেওঁ Synack Red Team, HackerOne আৰু Bugcrowdত Penetration Tester হিচাপে কাম কৰিছিল।

তেওঁৰ সুৰক্ষা গৱেষণাৰ স্বীকৃতি হিচাপে AT&T Hall of Fame আৰু Bugcrowd Community Award লাভ কৰাৰ তথ্যও প্ৰকাশ পাইছে। ২০১৯ চনত দিল্লীৰ Bharati Vidyapeethৰ পৰা Computer Scienceত স্নাতক ডিগ্ৰী সম্পূৰ্ণ কৰে ৰাহুলে।

AIৰ ব্যৱহাৰে চাইবাৰ সুৰক্ষা পৰীক্ষণৰ গতি কেনেদৰে বৃদ্ধি কৰিব পাৰে, এই ঘটনাই তাৰ এক উল্লেখযোগ্য উদাহৰণ দাঙি ধৰিছে। একে সময়তে, AI-সহায়ক সুৰক্ষা পৰীক্ষণৰ ক্ষেত্ৰত মানৱ গৱেষকৰ কৌশলগত সিদ্ধান্তৰ গুৰুত্বও এই ঘটনাই স্পষ্ট কৰিছে।